ئۆتۆبۆسێکی کەسک حەلەب بەجێ دەهێڵێ الكردية السورانية 2023

سەرنج دەدەم هەواڵی شەڕ و داگیركاری و كوشت و كوشتار، لە تەلەفزیۆن و ڕادیۆكانەوە دەیبیستی، جیاوازی زۆرە لەگەڵ خوێندنەوەی كتێب. گێڕانەوە هونەرێكی بەرزی ڕۆمان نووسە، ڕاستییەكەی ڕەگەزی سەرەكی نووسینی ڕۆمان، جوان گێڕانەوەیە، ئەوەی جان دۆست لە ڕۆمانەكانیدا بەرجەستەی كردووە یان باشتر بڵێین خوێنەر هان دەدا بەردەوام بێ گێڕانەوەكەیەتی، ئێمە لە ڕاگەیاندنەكاندا بوونی داعش و نیەت و كار و كردەوەكانیمان بیست و ئەو سەربڕین و كوشت و كوشتارەی لە گۆڕەپانی جەنگ لە باشوریش تارمایەكی ڕەشی پۆشی بوو، دەستەڵاتی داعش و شەریعەتەكانی دەوڵەتی ئیسلامی لەباشوری كوردستان، نەیتوانی بەردەوامی پێ بدا، ناكرێ ئازایەتی و دڵسۆزی گەریلا و پێشمەرگە نكۆڵی لێ بكرێ، بێگومان لە هەموولایەكەوە داعش تێكشكا، ئەو ترس و دڵە ڕاوكێ و كوشت و كوشتارەی لە ڕۆژئاوا، لە حەڵەب بەگشتی لە سوریا كرا، جان دۆست پنت و درز و كەلەبەری بوونی داعشی جوان وێنا كردووە، لەخوێندنەوەی ئەو كتێبەدا هەستم دەكرد جەنۆكە هاتۆتە ناو گیانم، هەستم دەكرد خەریكە هەڵدەوەرم، خەریكە ژیان دەگۆڕمەوە بەمردن، خەریكە دەسووتێم و هەموو ڕۆژێ دۆزەخێكی دیكە گڕدەدەن و منداڵەكانم لەبەرچاوم دەخەنە ناو ئاگرەوە، خوێندنەوەی كتێب جگە لەوەی وێنەكان و ئازارەكانی گێڕانەوە لە یادگای تۆدا دەمێننەوە، ئەو ڕێگەیەشت نیشان دەدا چۆن بنووسی و چی بخوێنیەوە. درێژەی نادەمێ خۆت بەدوای كتێبەكانی جان دۆست دا بگەڕێ، گەڕ هەموو كتێبەكە لێرە بنووسمەوە، دەبێتە ساردبوونەوەی خوێنەر، تەنها پێویست دەكا ڕانانێك و بۆچوونی خۆت بۆ ماونەوە لە یادەوەریتا چەند سەرەقەڵەمێك بنووسی، هیوادارم خوێنەری بین و دانەبڕێین