یازدە هەڤپەیڤینی تێلێڤیزیۆنی لەگەڵ پڕۆفێسۆر عەبباس وەلی الكردية السورانية 2024

ئەم کتێبەی بەردەست بریتییە لە دەقی کۆمەڵێک لە بەرنامەکانی ڕاوێژ لە ستێرک تیڤیدا کە ئەمن لە ماوەی دەساڵ، لە نێوان مارسی ٢٠١٤ تا ئاگوستی ٢٠٢٤ بەشداریم تێدا کردوون. ڕاوێژ بیرۆکەی مێشکی دۆستی من حەسەن قازییە. بەرنامەی ڕاوێژ لە لایەن وییەوە بیری لێدەکرێتەوە، لێی دەکۆڵدرێتەوە، نەخشەی بۆ دادەندرێ و پێشکێش دەکرێ وەکوو ئێدیتۆر و پێشکێشکار. لەو دواییانە دا ئەو هەنگاوێکی تۆخی دیکەی هەڵێناوەتەوە بە دەست پێکردنی پڕۆژەیەکی نوێ کە بریتییە لە نووسینەوە و بڵاو کردنەوەی هێندێک لە بەرنامەکان وەکوو کتێب، بۆ ئەوەی ئەو بەرنامانە بە چاپکراویش بگەنە دەست بیروڕای کورد زمان لە کوردستانی گەورە و لە ناو دیاسپۆرای کورد لە هەندەران کە لە زیاد بوون دایە. بەلەبەچاوگرتنی ئەو کاتە و کارەی لە پێناو ئەو مەبەستە پێویستە ئەوە ئەرکێکی قورسە، تەنیا کەسێک بەو وزە گەورەیە، بەو بەرعۆدەییە بێوچانە، و بەو هۆگرییە بێ هاوتایەوە دەتوانێ بیر لەوە بکاتەوە و جێ بەجێی کا.