Semay Sema: Kurdish Sorani 2024

مانگەشەوە و کەشوهەواش وا خۆش بووە، دەشت شین بوویتەوە و نێرگز تازە سەری دەرهێناوە. ماڵەکان سۆپایەکانیان کوژاندینەوە، وا پەیتاپەیتا لە باخچەی دادەنیشن و نانی ئێوارانیش هەر لەوێ دەخۆن. دەنگی ڕادیۆ و تەلەفزیۆنان لە حەساری زۆربەی ماڵەکان بەرز دەبێتەوە، تامەزرۆیی بەهار و گەڕان و سەیران لە چاوی هەمووانەوە دیارە، بەتایبەتی لەدوای ئەم زستانە سەخت و ناخۆشەی ئەمساڵ. ماڵی مام کەریمی هەموو بەهاران دەچوونەوە گوندێ و هەتا سەر لە پاییزێ نەدەهاتنەوە شارێ. بەس ئەو یەک دوو ساڵەی دوایی جیاواز بوون، سەما گەورە بووە و ئێستا دەچێت بۆ فێرگە، مام کەریم لە شارێ بەستراوەتەوە و دیاریشە کە دڵی بەمە خۆش نییە. خۆ ئەگەر لەبەر مام کاکلی نەبا، ئەوا سەمای هەر نەشدەناردە فێرگەی. بە بۆچوونی ئەو، فێرگە جێی نابەجێیانە، خۆ بۆ کچانیش هەر هیچ!