ئاژاوەی بێدەنگ الكردية السورانية 2023

کۆمەڵە شیعری “ئاژاوەی بێدەنگ” یەکەم کتێبی چاپکراوی منە و ئەو شیعرانەیە کە ساڵانێکە لەگەڵمدا دێن و دەڕۆن و دەژین، ڕەنگە بۆ ئەم چرکە سات و مەراسیمە قسەکردن لەسەر ئەوەی کە من چۆن ئەدەبیات و تایبەت شیعر دەبینم کارێکی باشنەبێت، ئەوە ساڵانی ئایندە باشتر دەردەکەوێت و ئێستاش ئەو کۆمەڵە شیعرە تەنک و هاوکات بچوکانە لەپێش دەمتانە، دەکرێت کەمێک ڕونکەرەوەی بینینی من بێت بۆ شیعر، هیوادارم ئەم هەوڵە بچوکەم، بتوانێت بەشدارییەکی بچوکبێت لەو میراتە دێرینەی شیعری جیهان، کە بە ئاوڕەکەی ئۆرفیۆس دەستی پێکرد و بە ئاوڕە بەردەوامەکانی شاعیرانی کورد و جیهان بۆ خەم و گوناه و ئاوارەیی و تەنیایی و ئازاری مرۆڤ بەردەوامە . لە بەشێکی (ئاژاوەی بێدەنگ)دا چەق (سەنتەر) ئاوەژوو دەبێتەوە. ڕووخساری دەریا مەلەکردنت بیر ناخاتەوە، ئاخر دەریاوانەکان لەمێژە مردوون. شۆستەکان ڕێگەیەکی سەلامەتتر نین لە شەقامەکان و ماڵ لە کۆڵان ژاراویترە، ڕۆژیش لەبن پەردەیەکی ڕەشەوە، بووە بە شەو. نارین ڕۆستەم ڕوانینی ئەم کۆشیعرە بۆ یادەوەریی هەستەکانی ئەم ژیانە، هەندێک بەدکارانەیە، چونکە وەک دەنگێکی شیعری پۆستمۆدێرن، هیچ تشتێک لەم ڕاستییانەی ژیان کە ئەزموونی کردوون بەها و ڕەوایەتییان نەماوە. هەموو بەهاکان هەڵوەشاوندۆتەوە و زۆرجاریش دەخوازێت بەهای ئەم بوونە، بە هەموو دیوەکانییەوە پووچ نیشان بدات.